Lunes, Hunyo 11, 2012

ewan

nagulat ako nang pagtingin ko sumakay sa sinasakyan kong multicab ang dating kakilala. siya nga, at hindi ako maaring magkamali.

siya ang isa sa aking mga bully..mga dati kong bully.

sa mukha ko lang siya kilala, pero ako pati pangalan kilala niya. hindi ko makakalimutan ang mga panlalait niya sa akin nung akoy nasa elementarya pa lang at maging sa hayskul kasi naging schoolmate ko rin siya. sadya yatang tinutukso ako ng tadhana at panay sunod ng taong hindi ko na sana gustong makita.

napatingin siya sa akin na kanina pang nakatingin sa kanya pero nilipat niya agad ito sa ibang direksyon. alam kong napansin niya ako. alam kong nakikilala pa rin niya ako dahil hindi pa nman lubusang nagbago itsura ko noon.

parati akong inaaway ng taong ito, alala ko. minsan nung naglalakad ako pauwi bigla na lang me sumigaw sa akin, “bakla! mamatay ka sana!” siya pala yon at kanyang mga kabarkadang bully rin. hindi ko alam ang dahilan kung bakit ganon na lang ang pagka-inis nila. hindi naman ako salbaheng bakla. hindi ko nman sila kaaway at wala rin nman akong inaway. 

hindi ko masyadong inintindi iyon kasi ayoko lang intindihin. pero sa loob-loob ko pala, hindi ko namamalayang lumalalim na ang sugat na idinudulot nun sa pagkatao ko.

habang lumalaki at nagkakaisip, dumarami ang mga insecurities ko sa sarili. marami akong kayang gawin at napatunayan pero tila hindi ko magawang ipagmalaki ang sarili ko kasi mababa ang tingin ko sa aking pagkatao. hanggang sa hindi ko na masyadong ini-engage ang sarili sa mga kaklase kong lalake. unti-unting nag-iba ang tingin ko sa kanila lalo na pag napag-uusapan nila ang mga bakla at panay pa ang tawanan.naging sensitibo ako at hindi ko sila masabayan at masakyan.

halos lahat ng kaibigan ko ay babae o di kaya’y lalakeng babae, wala akong kaibigang lalakeng pinagkakatiwalaan at sinasabihan ng mga personal na bagay tungkol sa akin..

iyon na siguro ang epekto ng pambubully nila―hindi na ako naging komportable sa mga lalake kalian man. kahit pinatawad ko na sila, hindi ko pa rin sila nakakalimutan.

sa dinami-dami ng maaring masakyan niyang multicab, nagkataon pang don din sa sinasakyan ko siya sumakay. pinaglalaruan nga talaga ako ng tadhana. magkatapat pa kami at di mapigilang minsan magkasalubong ang aming mga mata.

malaki na ang pinagbago niya. ang dating patpatin at gusgusing bully ngayon ay gumwapo na, tumangkad, at gumanda na rin ang katawan. maayos na ang kanyang pananamit. di ko alam kung ano nang nangyari sa buhay niya, nag-asawa na ba siya o maayos na ba ang kanyang trabaho. hindi ko maipaliwanag ang nararamdaman ko sa sandaling yon. parang bumabalik lahat ng galit ko at pagkainis sa kanila. at dahil siya ang nandoon, siya ang maari kong mapagbalingan. nakalimutan kong pinatawad ko na pala sila..

minsan nung nakatingin ako sa kanyang direksyon, pansin kong tinitingnan niya rin ako. at parang me gusto siyang sabihin..pero hindi ko alam kung ano at hindi rin ako sigurado.  ang dating mukha niyang puno ng pagkamuhi sa akin ngayon ay parang nag-iba na. parang wala na sa kanya ang muhi at galit. para siyang nahihiya. 

sa kabila ng obserbasyon ko pina-iral ko pa rin ang pride ko. ayokong kausapin siya. ayoko siyang pansinin. at higit sa lahat ayoko na siyang makasakayan at makita pang muli. 

mali ako, hindi ko pa pala sila lubusang napatawad..dahil ramdam ko pa rin ang inis sa kanila.

hindi ko alam kung kailan ko mababago ang aking pagtingin sa sitwasyon. alam kong ang tagal na ng panahong ‘yon at sadyang nagbabago ang mga tao.. 

nung pagbaba niya natanong ko ang sarili, 

“masaya ba siya noon sa kanyang ginawa sa akin?” oo, maaari. pero ngayon parang wala na sa kanya ang mga ‘yon..

“ako, masaya ba ako sa ginawa ko ngayon?” maari din, pero me malaking bahagi sa katanungang ito na ang tunay na kasagutan ng aking puso ay nagsasabing

“ewan, hindi ko talaga alam”.


1 komento:

  1. Hindi-nagpakilalaLun Hun 11, 07:30:00 PM

    very nice post! sana tinanong mo siya kung nagka-relasyon na siya sa bakla. kung sinabi niyang hindi.......tanong mo siya uli kung gusto niya ng first time......baka umulit pa siya pag natikman niya!!

    TumugonBurahin